A letter from June 17th, 2020

Dear FutureMe, إسراء....أهلا بيكي ف الحاضر اللي كان يوما ما مستقبل مجهول....زمانك اتغيرتي كتير واتعلمتي من الدنيا أكتر أنا هو إنتِ...بكتبلك في سنة 2020 م متمنيه ليكي توصلك الرسالة دي سنة 2025 وانتي فـ صحة كويسة "لو لاقدر الله كنتي متوفيه اتمنى حد غيرك يقرأها وتكون سبب أنها ترسم ابتسامة على وشه وتفكره بذكرى سعيدة وميحسش انه مفتقدك سواء حد بتحبيه أو اهلك " عدى 6 شهور على معرفتك بإسلام اللي حفظتي اسمه الكامل عن ظهر قلب "إسلام شحاته محمد شحاته أبو السعود" أتمنى يكون بخير فـ اللحظة اللي بتقرأي فيها الرسالة أو كان هو بيقرأها احلامي كلها بتتمثل فـ إني ف غضون سنه جايه اكون مع إسلام سواء خطيبي أو كتبنا الكتاب أو حتى اتجوزنا واتمنى خلال 5 سنين أكون قدرت أكمل الجامعة أو حتى أكون أخدت الخطوة دي لمستقبل أحسن ليا ولأسرتي وأولادي في اللحظة اللي بكتب فيها عدت عليا أمي وطلبت مني طلب فـ طبعا قولتلها حاضر ردت بدعوتها ليا " ربنا يكرمك ويعوض عليكي خير" يارب يكون العوض إسلام وربنا يكرمك بيه اوعي تنسي إنك بتحبي الرسم والتصوير والكتب اوعي تتخلي عن شغفك واملك تحت أي ظرف....يمكن زمانك شايله طفل أو حتى فـ حضن جوزك وبتعدوا الصعب قبل السهل وانتوا سند بعض ، ولو خاب ظني والظروف فرقتكوا اوعي تنسي ابدا اي لحظة حلوة عشتيها معاه ومتنسيش لو ده حصل تدعيله هو شخص طيب ويستاهل كتير...دايما لما بتكوني زعلانه بتروحي تشكيله وبيسمعك ويتأسف نيابة عن اي حد أذاكي...متنسيش تفكريه إنك دايما بتحبيه تحت أي ظرف وإن الحلو اللي زرعه ف قلبك عمره ماهيخلي مكان للوحش...وعدتي نفسك لما يكون ف استطاعك تصلي نافله وتدعيله وتطلعي صدقة باسمه وتختمي القرآن عنه...صحيح عنيد وبيقولك انا هدخل النار..بس حسنات الخفاء قادره تمحي ذنوب الناس وربنا هيعامله بلطفه ورحمته...إسلام هيكون ليه نصيب من اسمه.. ف متخافيش عليه ودايما خليه ف دعاءك..الجنه هتبقى حلوه وانتوا سوا...يارب تكونوا سوا دلوقتي وميخيبش ظني أبدا....عمرا مديد بالطاعة مزيد...اتمنالك حياة سعيدة انتي وكل اللي بتحبيهم ومتنسيش تحت اي ظرف ابعتي نسخة من رسالتك دي لإسلام كنتوا سوا وقتها أو لأ..متتأخريش انك تعملي بوعدك على قد ما تقدري إسراء سمير بيومي الأربعاء صباحا 7:50 17/6/2020