From your past ..

Dear FutureMe, التاريخ : 6/3/2015 ، الساعة : 6 صباحاً صباحو .. بعد اقتراح احمد للفكرة كتير حبيتا .. انو يجيك مسج انت كاتبو .. و بتكون نسيانو شي بيزكرك بماضي حلو عشتو .. و بنفس الوئت بيفرحك عمري هلئ 17 الا شوي .. يعني بعد سنتين المفروض كون سنة اولى جامعة بطمح لادخل هندسة عمارة او ديكور باذن الله من هلئ لسنتين بتوقع كون رجعت ع سوريا .. و كل شي خلص حاسة انو رجعتي مو مطولة اكتر من تلت شهور مابعرف ليش ولد عندي ها الأمل رفقاتي بهالفترة كتار .. مع ان يمكن صداقتي معن جنان بس عنجد هن متل اخواتي بالرغم من معرفتي فيهن محصورة بس بالنت " بيلسان ، احمد ، ريمي ، اية ً، دانيا ً، سلوى ، انس ، جوري ، اسراء ، حميدوف ، سارة " يمكن هني بعدن مجرد اصدقاء افتراضيين بعالم افتراضي بس بحس اني بعرفن تمام و اكتر من لي بعزفن شخصي رح احكي عنن شخص شخص .. بيلسان : اطيب و احن قلب .. اختي الكبيرة الحنونة عليي ، بتفق انا و هي بكل شي و منشبه بعض بالطبع ، بحس انو هي اكتر حدا ممكن يكفي معي وما رح افترق انا وياه لان اكتر الناس ئراب الي احمد : اخي الطيوب الحباب اللي مفي منو .. كمان احمد بحس مستحيل يبعد و مستحيل يتغير او تتغير علاقتي فيه .. وبخاف اني اخسرو ربي يحميه ريمي : بنوتة كتير حبابة ومفي منا .. هي غامضة شوي وبتخبي بس كتير حدا حساس و طيوب .. بتمنى اجتمع فيها بسوريا بشامنا بلدنا >3 دانيا : ام القلب الطيب الحنون اللي وسع الكل ومستحيل يزعل حدا .. اختي اللي بقدر الجألا بأي وقت ومابتردني ودايماً بتسمعني وبتوقف جنبي وقت بحتاجا اية: ئلبا طيب كتير .. احياناً بحس اني بفهما و احياناً بحس مافهمانة عليها شي يمكن لان هي حدا مزاجي كتير .. بس برغم من كل شي مشاكل صارت و برغم كل البعد لي صار مابتغير عليها و لا بتتغير عليي .. بحس انو هي اد مابعدت بتضل قريبة و مابقدر ازعل منها .. سلوى : كنا متل اخوات و اعز منحكي كل شي لبعض و ما يمرّ يوم بدون ما تحكيني او تحكي ع جروبنا انا وهي و بيلسان ، من وئت بلشت المدرسة تغيّرت ما بعرف ليش .. صار عندا رفقات اخدو مكانننا يمكن .. معد سألت الا لما نحاكيا كتير زعلانة منا وصرنا كتير بعاد عن بعض ،، الله يسعدا :) جوري : حدا كتير لذيذ و بينحب .. بالفترة لي مضت " قبل 7 شهور " كنا كتيير رفقة .. بس بعدا ما بعرف شو بعدا عني و تغيرت .. بهداك الوقت كان في كتير مشاكل عائلية و بين رفقاتي و بيني وبين مجد .. هالشي بعدني كتير عنا و اثر ع علاقتنا حتى صارت سطحية :) اسراء : اختا لجوري .. حبابة ومفي منا .. هوي من زمان انا و هيي مش كتير صحاب غير من بعيد لبعيد و عالجروب لان ماكانت تفضا بسبب شغلا ما تغيرت بعدا متل ما هيي الله يحميا انس : اكبر حدا بكل عيلة فستق .. حباب و حنون ع يلي بيحبن .. بيحب الكل و بيساعد الكل .. كفو وئت بتحتاجو كان كمان من الناس القراب الي كتير بس المشاكل لي صارت بعدتو و صار مجرد صديق فيسبوكي :) سارة : طيوبة و لذيذة و بتحب الكل .. نشغلت بدراستا من فترة و معد بينت ربي يوفقا حميدوف : شب كتير لذيذ و حباب .. حمصي يعني حكياتو حلوين كتير كمان كان من بيت فستق و كان مايطل الا شوي كل فترة بس بالرغم من هالشي كان حدا كتير منيح مع الكل لما صارت المشاكل هوي اول حدا بعد و لغا كل شي الو علاقة بالنت لفترة .. بس بعدا رجع ودائماً كل فترة بيحكيني و بيطمن عني و عن الكل .. الله يحميه ❤ ___ مابعرف بهالسنتين اللي رح يمضو شو اللي رح يصير مين رح يروح و مين رح يضل و مين رح يجي مابعرف شو الشي اللي رح حئئو من اهدافي و احلامي بس باذن الله رح كون حئئتون 1 - اتعود ع الرياضة اليومية و اتّبع نظام غذائي 2 - صلي كل الفروض و اقرأ الازكار و القرآن دائماً 3 - اخد البكالوريا بمعدّل منيح وادخل فرع هندسة 4 - حاول اقرأ كتير و اقتني كتب .. و زيد ثقافتي بكل شي 5 - نظم وئتي و استثمرو دائماً 6 - كون كتبت اول كتاب الي او بلشت فيه 7 - كون حدا ناجح و فعال بالمجتمع 8 - اقدر اعتمد ع حالي و ما احتاج حدا 9 - ما علّق قلبي و عواطفي بأي حدا كان و اتوقع روحة الكل باي لحظة 10 - اعمل صفحة اعلامية عالفيس بوك و انجح فيا .. وكتير شغلات غيرا .. كتير شغلات بطمحلا هلئ اليوم انا بالسعودية .. بعد 22 يوم راجعة لمصر يمكن بعد سنتين كون بسوريا .. و يمكن كون هون .. و يمكن كون بمصر الله اعلم .. بس المهم هوي انو اقدر اتأقلم مع المكان اللي رح كون فيه بتمنى اجتمع بكل رفقاتي باهلي اللي اشتقتلون كتير ارجع لحارتي و لبيتي .. ساوي كل شي بحلم فيه هنيك بين اهلي وناسي يارب .. منار لما تقرأي هالرسالة اوعا تزعلي اذا كنتي مفارقة حدا .. اذا كانو معك ابتسمي بكل الاحوال .. كل شي بيمضى درس الك تعلمي منو انا متأكدة انو بس ترجعي و تقرأي هالمسج رح تكوني حدا واعي كتير بتقدري تكوني هيك و رح تكوني حدا ناجح بحياتو و بشغلو طموحك بتقدري تحققييه سلامو