A letter from January 7th, 2020

1/1/2020 اليوم اول يوم بالسنة الجديدة الساعة 4:40 الفجر اكتب هذي الرسالة لنفسي اتمنى في 2025 لما تقرينها راح تكوني سعيدة ومحققه احلامك واكثر ثقافه وجمال وتغلبتي على مخاوفك وغيرتي معتقداتك ووصلتي للمكان اللي تطمحي له ♥️ حالي الان: يفترض اني الآن ثالث سنة جامعة لكن بسبب تأخيري، انا اللحين انتظر قبولي بالجامعة وجداً شايله هم واحياناً ابكي لمجرد التفكير باني ما انقبل، وتكون 3 سنوات ضاعت من حياتي! جدا يخوف اتمنى بعد اسبوع تكون واصلتني رسالة القبول رغم ان محد راضي يساعدني من اهلي ويودوني الجامعة بتكلم عن الجامعة والتخصص بحكم اني احب المستشفى وبيئة العمل فيه واكثر وظيفه اشوف نفسي فيها ف قبل سنه كنت مقررة ادخل "ادارة مستشفيات" واللحين غيرت رأيي وقلت بدخل "ادارة عامة" بحكم ان اماكن التوظيف رح تكون اكثر وبتكبر فرصه الوظيفه لكن ما ادري بعد التحضيري اذا بكون ع نفس الرأي ولا غيرت كلامي واقتنعت بتخصص ثاني، نشوف ايش مخبيتلي الحياة .. قبل اسبوع بديت اتعلم انجليزي واتمنى ان بعد ٥ سنوات اكون اتكلم الانجليزي بطلاقة لانه وقت كافي وزيادة . وان شاءالله اكون بدراستي للجامعة ماخذة بكل السنوات صيفي ف اخلص اسرع ومابتخلص الخمس سنوات الا وانا متخرجه وعندي خبرات ودورات وموظفه بمستشفى او بمطار او وزارة او بمكان انا احبه بغض النظر عن الراتب . وما اعرف اذا هو وقت كافي اني اتكلم عن السيارة اللي نفسي املكها لكن سواً كان بعد خمس سنوات او اكثر ان شاءالله بيجي اليوم اللي اشتري فيه "روز رايز" واكون لو عالاقل توي بديت استثمر او ابني بيت او استراحة لي . الان انا مركزة ع دراستي وانتظاري للقبول وشايله فكرة الحب من بالي ولكن اتمنى لما افتح هذي الرسالة اكون لقيت شريك حياتي حتى لو كان اللي بيننا علاقه حب ولسا ما وصلت للزواج، لكن بتكلم عن مواصفات الشخص اللي ابيها تكون فيه وبقارنها للمستقبل حتى لو ما فتحت هالرسالة الا بعد ١٠ سنوات عندي فضول اعرف اذا تغيرت المواصفات اللي ابيها او لا طبعا اول شي هي تفكيره ابي شخص متحرر شوي يرضى بالحجاب وبالوظيفه بالمكان مختلط ويعطيني حريتي وبرضو ابي احس انه صديقي قبل يكون زوجي ويكون انسان مقتدر وابيه حق سفريات وتمشيات ويكون انسان مرح و ونيس وكمان ويكون شخص انجز بحياته وله خبرات كثيره استفيد منها . بتكلم عن الاشياء اللي احبها وابي الوقت اللي جالسة اقرا فيه ذا الكلام ان شاءالله اكون محققتها طبعا انا في وضع سيء من الناحية المادية واخر رسمة رسمتها كانت قبل سنة، لان ماعندي الميزانية اني اشتري اغراض الرسم واتمنى اكون بذا الوقت رجعت له وحققت حلمي في اني اعرضهم في معرض او في اي مكان تجمع للرسامين او اكون فاتحة منه بزنس، وحتى لو ماكنت ابيع رسوماتي لكن يكفي اني كملت بالشي اللي احبه وطورت من هوايتي . ثاني شي انا فتحت حساب بالانستقرام وبديت انزل فيه وحاطه ببالي اني بيوماً ما رح اصير مشهورة ، ما اعرف اذا بكون فعلا انشهرت ولا وقت فراغ كنت اسلي نفسي فيه وفترة وراح اتركه ولو بسأل نفسي ايش ابغى من الشهرة؟ جوابي طبعا ابغى الاعلانات اللي بطبيعه الحال رح تكون مكسب مادي لي لان صراحة اكثر شي عائق لي الان هو "الفلوس" ف اعتقد لو انحلت ذي المشكلة راح اتخلى عن هوس الشهرة ! وبرضو افكر افتح لي بزنس صغير ، طيب ايش هو البزنس ؟ صراحة ما اعرف لكن ابي ابدا ادخل مال من الان . شي مضحك اني افكر في الماستر من اللحين وانا لسا مادخلت الجامعة اساساً لكن ان شاءالله ما اتخرج الا وانا مدخرة مبلغ قادرة اكمل فيه دراستي العليا كمان انا مررة احب البحر والغوص، امنية من امنياتي وان شاءالله احققها اني اغوص وكمان اتدرب عالفروسية واليوقا، واني اكون انسانة صحية رياضية ومهتمة بشكل جسمي وبرضو في شي استحي اقوله لـ اللي حولي عشان لا يقولو قد ايش طموحها عاليه ! بس حلم من اكبر احلامي يكون عندي رخصه الطيران، بالوقت اللي اشوف فيه فيديوهات الكباتن وقد ايش هم مبسوطين مرة استمتع ! كيف لو انا كنت مكانهم ، يالله ما اتخيل جمال الاحساس ♥️ والتعلم على عزف البيانو او القيتار او اي آله موسيقية واكون من الاشخاص اللي يعرضو رسماتهم بمكان عام لان دايم تمنيت اكون مكانهم واكون كونت صداقات مع بنات مرتاحة معاهم وكمان اني اكون اكثر ثقافة واكون انسانة اجتماعية لان لو بتكلم عن وضعي الان! ابداً مو راضيه فيه صراحة كلها اشياء ابيها بحياتي لكن مابديت بـ ولا شي ، كل شي مأجلته لبعدين ومتى راح ابدا ! ما اعرف عموما برضو "التأجيل" من المشاكل اللي ابي اتخلص منها 2/1/2020 شوي حزينة، وصلتني اليوم رسالة رفضي من الجامعة وما قبلوني بس لسا مصرة اني اكمل تعليمي الترم ذا قبل السنة الجاية، ف راح اروح لهم الاسبوع الجاي مارح ايأس 7/1/2020 تابعت مقطع وجلست اطبقه وانصدمت من النتيجه وجيت اكمل الرسالة! المقطع هو عن ترتيب قيمك ايش اهم الاشياء بالنسبة لي انصدمت ان النتيجة كانت ‎1- الحب ‎2- الحرية ‎3- الثراء - والعلم ‎4- الجمال ‎5- العائلة ‎6- الصبر - والسلام بعد ماخلصت الاختبار زعلت على نفسي كيف يكون الحب اهم من باقي الاشياء وكيف ارضى ان الحب يعمي عيني عن العلم وحريتي والسلام واهلي! قبل ما انهي كلامي "نورة" اكيد اني جالسة اقرا ذي الرسالة معاك بس ابي اقولك شكرا لانك دائماً كنتي اول شخص لما التفت القاه معاي، انتي اللي دائما كنتي تحاولين تغيريني وتنصحيني وفي اضعف حالاتي كنتي انتي اللي تساعديني، يارب في هذا الوقت تكوني في اسعد وافضل مكان جدا احبك ♥️ شعور مخيف وانا جالسة اتكلم عن حياتي بعد خمس سنين من الان واحس لسا في كلام كثير ابي اكتبه بس بوقف هنا وارسلها اتمنى لك حياة مليئة بالسعادة يا افنان ، واذا قريتي ذا الكلام وانتي لسا في اشياء ما حققتيها اتمنى ما تزعلي انتي قوية وبتوصلي للي تبغيه وبأفضل مما كنتي تنتظريه لو بعد عشر سنين احببك انا دائما فخورة فيك ♥️