A letter from December 15th, 2019

هاااااي مروة هابي بيرذ داي تويو ماي لاف هههه آند هابي لايف ❤❤ اليوم عيد ميلادي الـ25 اووو كبرتي اطفلة دوكا يبداو يجبدولك السوجي تاع زواج باسكو ف مجتمعنا اذا الطفلة وصلت 25 سنة وماتزوجتش يسموها باااااايرة مي معليش بووووري وبلاكي تتخلاي على احلامك ومستقبلك باسكو المستقبل عمرو ماكان راجل وهذوك الرجال لي يحقولك احلامك كاين ف الافلام برك مش ف الواقع واذا كان كاين راجل يقدر يحققلك احلامك فهو طبعااااااا ابوكي ياغبية وماكانش غيرو ، اما اذا كنتي تزوجتي منا لذاك الوقت ورافدة بنك ولا بنتك ف يدك وش راح نقولك تفووووو 💩 المهم المهم اليوم السبت 14 ديسمبر الساعة 00:54 ليلا مريحة ف لبيرو تاعي نشرب ف كافي وطبعا الزريعة بجنبي ادمنتها ياجدك هههه اليوم صراتلي هدة مانقولش حطمتني مي وعاتني وفتحتلي عينيا واكتاشفت من وراها بزاف حوايج وزاد اصراري بطريقة لا تعقل على تحقيق احلامي منيش راح نحكي عليها باسكو منا لذاك النهار راح نكون نسيتها ان شاء الله مي كلمة (يوسف) رايحة تفكرك كلش.... منا لـ2025 نتمنى تكوني وصلتي وين باغية اكيد راك تكوني تخرجتي ماستر هندسة بوليمار برااااافووو مي الله اعلم اذا كنتي حققتي حلمك بدراسة الماستر فتركيا او لا، امممم والخدمة ؟ هههه ان شاء الله تكون تسڨمت الدزاير منا لذاك النهار ومباعد ساهل ولا نڨولك حاجة ان شاء الله تكوني خرجتي من الدزاير ڨاع... وطبعا راك تكملي الدكتورااااه اوك؟ ف هاذو 5 سنين تاع الجامعة كنتي تقولي نحفظ الستين كهدية لأبي ان شاء الله تكوني درتيها باسكو حلم كبير والله يستحق العناء وهذاك العبد لي راه راقد ف الشمبرة لي بجنبك ماعاناش غير شوي باه يوصلك وين راكي واصلة على ذيك نتي ثاني راح تحاولي بكل جهدك ترجعيلو خيرو ولو نقطة من البحر لي سقاك منو باسكو الخير تاع الوالدين عمرو مايرجع ولا يتساوم واذا ماكنتيش حققتي هذا الشي نووووضي يابغلة وش راكي ديري وش تستناي 😡 يادرا شحال من كتاب تكوني قريتيه ويادرا قدرتي تكتبي الرواية لي طول عمرك حلمتي تكتبيها..!!! اذا كنتي كتبتيها ومخبيتها ف الخزانة واللله مانسامحك نوضي ديري المستحيل وانشريها خلي اسمك راسخ حتى وان متي هو يبقى محفور ف واجهة كتاب على الاقل 😺 ماهيش حاجة ساهلة طبعا النجاح عمرو ماكان سهل مي نتي ثاني مكيش ساهلة 😉 سقسيني انا نقولك.. وهاذي 🎥📷 كاش خبر عليها هههه ياو اشريها بيعي سنسلتك واشريها بركينا من الخرطي تاع العجايز قادرة تموتي ف اي لحظة وتخليها ورث لغيرك على الاقل تكوني عشتي _كلمة عشتي كفيلة_ وطبعا عندي اهداف اخرى وبزاف امور باغية نحققها مي ان شاء الله نكون حققت هاذو لي لفوق ياسر واهم شي ان شاء الله تكوني مازالك مروة لي نعرفها باسكو صدقيني راك نقولك كلمة مش من باب المجاملة والله مي مكانش وحدة كيفك ف الدنيا لا ف شخصيتك ولا ف عاقليتك ولا ف جمالك ولا ف اصرارك وعزيمتك واهم شي ولااااااا ف قوتك انتي اقوى شخص عرفتو ف حياتي واوعى شخص صدقيني وتستغلي وش عندك غير يجي نهار ويعودو يسمعو بيك ف مواقع التوصل ويتمناو مقابلتك..❤ ااااه قبل لاننسى sport يابقرة كون تكوني حبستيه وزاد وزنك للـ60 نقتلك واليوغا ان شاء الله تكوني وصلتي لمراحل متقدمة فيها.. هاذو الايامات راني نتعلم ف البرمجة ههه معرف منا لذاك النهار وين نكون وصلت فيها مي مام مانكون وصلت فيها لوالو رايحة نبدا من الصفر ونوصل لبعيد فيها اوك؟ بالنسبة للعلاقات انا توجور وحيدة هاذا شي متفق عليه اهل السنة والجماعة 😂 هههه نقصر برك عندي عايلتي ابي امي عبد الحميد جابر هيثم عبدو وقطي طبعا هههه ياسر عني هوما حياتي وروحي وسندي وملجئي هوما my everything ونموت عليهم واحد واحد وبلا ماننسى ماما(جدة ثلجة) وبابا (جدي عيسى) وخالتي وخوالي باسكو نعم الاهل بعد اهلي ونقدر نقول عايلتي الثانية وملجئي والبيت الوحيد لي حسيت فيه بالحنان والامان والله نحبكم لدرجة واحد مايقدر يإيماجينيها ❤ ااااه قريب نسيت سمية هذيك اللصقة لي ماتخطينيش ننموت هههه نقصر والله نحبها وهي اختي لي ماجابتهاش امي ربي يدومها بيناتنا هي كانت ماي باست فراند قبل 5 سنوات من الآن وان شاء الله تكون هكاك بعد 5 سنوات من الآن ، غدوا رايحة لعندها نديرو كيكة ونحتافلو منيش عارفة وشنو هي المناسبة مي هكاك نفحتلنا 😂 طبعا هذا الكلام كامل اذا كنت مازالني نعيش ان شاء الله اما اذا كنت مت ربي يرحمني ويغفرلي 😢 واذا كان واحد غيري يقرا ف هاذي الرسالة وش نقولك استرني يسترك ربي ماتفضحنييش باسكو لي رايح يقراها طبعا يضحك هههه ومهما كان لي راه يقرا فيها نقولو "نحبببببك" اتفكرني وروح لقبري واقرالي وش مكتوب راح نسمعك ونفرح بزاف.. امممم وهكا نكون كملت رسالتي الى المستقبل ايا استودعك الله الذي لا تضيع ودائعه وبالتوفيق يابطلة