رسالة من 19 يوليو 2025

Dear FutureMe, من جوجو الحين… إلى جوجو اللي في المستقبل 💌 هلا والله يا أنا… يا ترى وينك الحين؟ هل تحققت أمانيك؟ هل ضميتي ورقة القبول لتخصصك بيدك وقلتي: “أنا فخورة فيني”؟ أنا الحين أكتب لك وقلبي مليان مشاعر. في لحظات حسيت إني بضيع، حسيت إني ماني قادرة أكمل، بس كنت أوقف وأقول: جوجو، ترا ما وصلتِ لهنا عشان تتراجعين. يا أنا، أنا كنت أذاكر وأنا تعبانة، وأحيانا أبكي من القلق، بس أكمل. كنت أكتب في الدفاتر وأحط أهدافي على الجدران، وأقول: “قريب… قريب أوصل”. كل اختبار، كل دمعة، كل لحظة شك… كانت عشانك. أنا سويت اللي أقدر عليه في القدرات، وحطيت كل تعبي في التحصيلي. ما كنت أبغى أرفع نسبتي بس، كنت أبغى أرفع راسي، وأمسك حلمي بيدي. والحين، جوجو المستقبل، جا دوري أسألك… هل حققتي حلمك؟ هل دخلتي التخصص اللي تحبينه، اللي كنت أتخيله كل ليلة قبل أنام؟ هل أنتِ راضية؟ هل قلبك مرتاح؟ هل تحسين إن تعبنا ما راح هدر؟ أنا فخورة فيك، سواء كنتِ في بداية الحلم أو عايشته فعلاً. أنا مؤمنة فيك، حتى لو الدنيا كلها شكّت. وإذا لسه ما وصلتي… خذّي نفسي، وكمّلي. لأنك قوية، لأنك جوجو. أنا أحبك، وأنتِ أعظم هدية أرسلتها لنفسي بالمستقبل. مع كل نبضة أمل، جوجو اللي كانت تحاول عشانك �