A letter from Apr 02, 2025

Salutti Spagutthi Ig ha wieder mou eh Brief becho vo mir, hihi und es duet mir aube grad de Tag versüesse. Geschter aus Aprilscherz, het öpper mit Chläberli Sache ahgschribe: (Uhrsula, Herdbert, Kühlfrank, Mikrowerner, Kaffeesabine, Müllrainer) Schüsch geits mer sehr guet muessi säge. I bi grad wieder imne hööch mitm Raphi, shet chli Rough patches gäh ir letschti, i ha eifach sones herts Härz gegeüber ihm mängisch. Und i wett das gar nid, i wett nid hässig reagiere, wener öppis fausch macht oder nid tscheggt. I weiss nid wiesoni ihm so viu hööchi Standards setze. Auso mou haut eifach die gliiche woni mir ou steue, aber das muessi gar nid. Uf jede Fall heimer geschter zämme d'Amoresession Predig 1 glost und es het mega guet dah. Mir hei sit laaaangem wieder mou chli chönne ustuusche. Und bim heiloufe hani när eifach soo es guets Gebät mit Gott gha, woni eifach aus ha chönne loslah und abgäh, mis herte härz härelege und deheime hani när am Raphi ahglüte und mir hei eis vo de beschte Deeptalks gha ever. Und i merke wie mis härz würkli viu weicher isch gägeüber ihm und i muess mi eifach dra erinnere, mis härz weich zbhaute, wiu sjenzer gen, wott scho eifach es herts härz. und dasch mega schädlech für mini gueti luune, mini liebi und mini geduld u.v.m. Anyway i freue mi mega uf die Zyt wo itz chunnt, irgendwie wieder meh liebend zsi und meh Quality time ha, die Amorepredigte wetti würkli sehr gärn witerzieh! Aprospos, de Raphi isch uszoge, u zwar praktisch näbe mi. Und es macht so fröid, er isch so nööch und mir chöi üs ging no hurti gseh. Weni heichumme chani no gschwing goh es guet nacht müntschi gäh und ig liebes! Es het so Spass gmacht dMöbel zfinge und aus ihzrichte und eifach gsamthaft mit der Wohnig. I freue mi mega weni dert cha ihzieh! s'Einzige woni äbe ha isch, dasi mi noni so wohl füehle dert. Heimer äbe im Deeptalk usegfunde, dass de Raphi weni bi ihm bi, zyt duet nutze für sache woner no muess mache, weder wemer bi mir si, dueni mi fokus ganz uf ihn setze. und dass machts no grad chli schwirig. smami het gseit das miech nüt, das sig eh prozess u do muessi vertroue dass Gott ganz eifachi Lösige parat het. si het scho rächt und glich bini sehr gspannt und nervös für die Zuekunft. Dhochzyt und dszämmezieh. I frage mi, öb mer üsi Beziehig no chöi vertöife, öbmer nis guet chöi ihläbe wemer nis immer gseh und öbmer nis nümme so strite wie im moment. öbi mi würkli so viu eleini und verlore füehle wienis dänkt ha. öb mer nis no meh liebe, öb *** guet und gäbig isch, auso öbs mer nid weh duet und öbmer nis äbe ou dert guet finge. es git so viu wo ungwüss isch und woni mi mega freue aber woni ou so angscht dervor ha. i ha so angscht wäg vo mom&dad. i liebe die zwöi so vo herze fescht und chamer eifach nid vorsteue se jede tag zgseh und zärfele. und i due täglech rot hole und ustuusche und letscht wuche bini so ufem sprung gsi u nie deheime, de hani mini eutere richtig afah vermisse... anyways, i think its gonna be though, shifting my dependence from my parents to my partner. wie du merksch, grossi changes chömme uf mi zueh. Titan Bikes, wow isch das schwirig, i rede geng drüber dasmer nis müesse entscheide itz de, aber entscheide dueni mi glich nid. i dues eifach immer vor mi häreschiebe u es düecht mi, es wärd nid eifacher. es isch eifach so risky, es git aber ou so viu chance, was isch wemer grobe verluscht mache, hangt de raphi so fescht im gschäft, daser nie cha ferie mache. und nie cha frei si. i ha scho mega angscht dasi einsam bi... eh ja, gibes haut gott ab. Und Flitterwuche, do bini gspannt öbmer das gschafft hei... wiu schlussamend gsehts momentan so us aus chönnt der mösiö ke ferie näh... und summerferie in lucca, si ou doof, schlofi de mitm raphi im zimmer oder mit der lea? hiiilfeeeee. När hani no gar nüt verzeut über die dummi Idee wo ig und dLea hei gha, mit dere WG in Alberswil. Zyschti isch d'Idee ufcho, Mittwuch go ahluege. dCorinne wär derbi, het aber de Ahspruch ih ihrere Wohnig zblibe. Joa und itz ischs das äuä gsi... Mit der Lea hanis im Moment wieder mega guet. Das Jahr letscht Jahr het üs scho viu meh usenang bracht aus mer erwartet hei. Oder aus mer gmerkt hei. Uf jede Fall, het si itz finally mitm Keno Schluss gmacht und sisch aus wär si itz ersch wieder heicho. Das isch natürli sehr übertribe, aber si het haut wie sochli ihres Härz no dertgloh. Und es isch würkli so aus wär wie eh riese Schatte abgfalle und si cha wieder schnuufe. Sie würkt viu lebändiger, würkt ou viu presänter, ou grad was mis läbe ahgeit. Meh merkt si het wieder Kapazität de voll Fokus uf angeri zgäh, ou wenn ja da no der Dave isch. Der Dave isch entweder heavensent oder eh heftigi Enttüschig. I tendiere zum erschte, chas aber noni säge und bi no sehr unsicher, gloub ou grad wiu de keno so manipulierend isch gsi, hani eifach angscht dases wieder so usechunnt. Aber äbe bis itz hani nüt negativs zmäude über ne und über die zwe. I gloub i sött mit öpperem eh wett abschliesse, dass si nächschtens grad zämmechömme. hahah, aber ja nächschtjahr weissis ja de. I bi uf jede Fall mega happy, dass Layeah wieder voll und ganz stabil isch, dasmers besser hei denn je und über aus (i meine würklech) aus chöi rede. Es duet guet sone fründschaft zha, wo meh eifach sich säuber cha si, rot hole, spass ha, tratsche, lache, spörtle und so witer. I ha immer gseit, i wett nie eh beschti fründin ha, aber wie cool dases isch hätti mer nid im troum chönne vorsteue. es matcht eifach. es freudet eifach. und gott isch im zäntrum, wie cool wosch no si, lea? Mis läbe isch mega cool momentan, ungwüss, aber i läbe mega im Moment, u bi ou mega im geischt, merke wie mer predigte guet düeh, wie 10min bäte guet duet und wie gott släbe eifach dermasse verbessert. I liebes eifach immer dörfe i dä Geischt vo ihm ihztouche und gueti Luune und Fröid am Läbe dörfe zbecho! It makes me very happy :) Zimmerchreis het sech letscht Jahr würkli schliimm entwicklet, so dasi änds Dezember gseit ha, es längt, i cha nümme. Itz heimer sitm 25i neui Regelige und es isch mega nice, nid immer müesse Ahschiss zha wiu meh weiss, **** sisch scho wieder Zyschti. Sondern eifach normal de Tag zstarte unds eifach loh druf ab cho. Finges toll wie die Girls aui cooli Inputs und so witer ihbringe. sisch defintiv eh säge. Obwohl ig mega unsicher bi, wies witer geit, wemer hürate. I würd mega gärn öppis zämme finge... Glichzytig wetti das woni ha ou nid verlüre. Ja, i lohs schlussamänd eifach loh druf ab cho und vertroue druf das Gott e gueti Lösig het.