A letter from Dec 31, 2024

حبيبي عبيدة، لما تشوف رسالتي هنكون كملنا سوا ١٦ شهر و ٦ أيام بالضبط (حسبتها بال Ai) ولسا فايت على أول مرة تقولي بحبك كام يوم بس. من سنين طويلة، تقريبا كنت لسا في إعدادي قريت في كتاب ناسية إسمه إن البطلة عملت ده مع حبيبها، كان قاعدين سوا قدام بعض و فاتحين اللابات و كل واحد فيهم كتب رسالة للتاني و المفروض توصل بعد ٥ سنوات. البطلة مكنتش بتحكي ده لما حصل لا، كانت بتكتب و بتقول انها وصلتها اليوم رسالة من الماضي من خمس سنوات، من حبيبها السابق. يعني قبل ما الرسالة توصل كانو انفصلو:) والحقيقة إن الموضوع مخيف و مجازفة فعلا. إنت بتراهن الدنيا على إن الشخص ده هيكون موجود لسا في نفس المعاد. مع ان لسا مفيش أي حاجة واضحة و لا سهلة. وعشان كدا عمري ما عملت ده مع أي حد إلا نفسي، نفسي هي الوحيده اللي أقدر أراهن على وجودها بس. ده كان شكل كل حاجة في حياتي قبل ما أعرفك، مش متأكده ولا مؤمنة بأي حاجة غيري أنا. بمشي في الدنيا واثقه في نفسي بس، الأهل و الصحاب و الحبايب موجودين بس ثقتي مكنتش بهذه الجراءة. وعشان كدا في الليالي الصعبة كان بيبقى النوم مش سهل بسبب كل الأفكار و الأصوات و الحاجات. لحد ما عرفتك. بقيت إنت الحاجة الوحيدة اللي واثقه فيها ومؤمنة بيها وبوجودها. شيفاها قدام عنيا كحقيقة غير قابلة للتشكيك. إنت أجمل حاجة صدقتها، و أحلى حلم شيفاه بعنيا وقادرة ألمسه، كل حاجة حبيتها في حياتي كانت عايشه في خيالي و أحلامي، وعشان أكون معاها كان لازم أبقى مغمضة عنيا. بس معاك، كل حاجة حقيقية وواقعيه حتى الحلم، بشوفه بعنيا واضح قدامي من غير خوف إن لو حد صحاني كل ده هيختفي، لأني حتى لما بصحى بتكون لسا موجود. أتا بحبك أوي، بحب الصدفة اللي جمعتنا. وبحب حتى لما نزعل لأني عارفة إن زعلنا و خوفنا وقلقنا هو شكل مختلف بس لحبنا. عشمانة أوي في ربنا زي ما حقق دعواتي فيك إنك و إنت بتقرأ الرسالة دي تكون مش بس حبيبي لكن كمان خطيبي ودبلتك في إيديا و بنجهز سوا لفرحنا و حياتنا الجاية. شكرًا على كل حاجة عملتها و لسا هتعملها، و على كل الحاجات اللي معملتهاش عشان عارفة إنك لو بإيديك كنت هتعملها. بتمنى من ربنا يطول في عمري عشان أعيشه معاك، وبإيدينا سوا نبني البيت اللي بنحلم بيه، لأنك إنت البيت اللي كنت بحلم بيه. و خواتمنا اللي من ورق تكون حقيقة بين إيدينا، ومستناش حد ينام عشان أعرف أكلمك و أقولك بحبك. كل سنة و إحنا مع بعض و لسنين جاية وجاية♥️