A letter from Sep 27th, 2021

Dear FutureMe, ٢٨ سبتمبر ٢٠٢١/ الساعة ١:٤٩ بعد منتصف الليل. عمري الحين ٢٣ توني دخلته في سبتمبر، اه يا سبتمبر شهر الخريف عند كل الدول الا عندنا حر. بتوصلني هذي الرسالة بعد خمس سنوات! بيكون عمري وقتها ٢٧!!! يمامي بكون كبيرة في عز شبابي واووو الى دانه الرقيقة، لكن القاسية على نفسها، اعتذر لك على كل الاشياء الي مريت فيها، عن القرارات الخاطئة الي اخترتها، عن كل الامور الي خلتك تبكين وحيدة في الليل، على ان الظروف مو بيدي الا اني دايما الوم نفسي، وللحين قاعده الوم واقسى عليك، اتذكر مرة في السيارة بكيت لاني قررت احب نفسي لاول مرة، لكن اسفه للحين ما حبيتني بالشكل الكافي، حبيت اصدقائي حبيت عائلتي الي تفكيرهم مو نفس تفكيري ورغم ذلك حبيتهم وتقبلت اختلافنا، حبيت اماكن زرتها لمرة واحدة، وحبيت اماكن شفتها فقط من شاشة تلفوني على امل اني اشوفها في واقعي يوما ما، حبيت لوحات لفنانين ، وقعت بغرام جميع انواع الاغاني الروك، الكلاسيك، البوب الكوري والامريكي، حتى اني سمعت اغاني فرنسية، مافهم هذي اللغات الا ان شعور الموسيقى شي يتجاوز اللغات والاختلاف، حبيت جميع انواع الفن والمتاحف ، حبيت اشياء ماقد شفتها بعيني المجردة حتى اني وقعت لها بشدة الا اني ماقدرت احب الشخص الي اشوفه في المرايه كل يوم ، على العموم انا الحين في السنة الاخيرة من جامعتي، بتخرج سنة ٢٠٢٢ ، اما الحين احنا في سنة ٢٠٢١ ، لسى كورونا ما خلص، اعتقد انها كانت اسوء سنه مرت علي، ولكن الحمدلله على كل حال، امممم كانت سنة مليانه مخاوف، اعتقد انها مخاوف المستقبل، من كنت صغيرة ما كنت اخاف من شي ابدا كنت شجاعه ، ولكن هذي السنة غيرتني بشكل جذري، اعتقد انه خوف السنوات الماضيه الي كتمته بداخلي قاعد يظهر لان مش طبيعي كيف صرت اخاف من كل شي، ودي ارجع دانه القوية، اتمنى نرجع يا دانه ارجوك خلينا نرجع، قاعدة افكر اكمل الماجستير مادري لو بقدر اكمله او لا، بس في خاطري ، رغم ان الي حولي ما يشجعون الا انني بحاول باقسى ما عندي، لكن ارجوك اعذريني لو ما قدرت، يارب تكون عندي وظيفة وقتها واكون مستقله وقوية، اتمنى تتلاشى مخاوف المستقبل، اتمنى نتشافى من الماضي والندوب الي للحين ما راحت ، ابغاك تكونين قوية مو بس من برا حتى من داخل ، ماعرف لو بكون وقتها مأسسه عائلة وزوج، لكني للحين ما حصلت الشخص المناسب، دايم اقول بحصل زوجي في بلد ثاني، لذلك خلينا نسافر ونشوف العالم ونلتقي بزوج وسيم محترم، اذا حصلتك يا زوجي رح اضربك، اتمنى اسافر كوريا وبلاد ثانيه ابي اشوف الاماكن الحلوة واشوف غروب الشمس من عدة دول، ابي ازور نيويورك واسكن في بناياتها العالية ابي اشعة شمس نيويورك تقومني الصبح ،ابي اشرب قهوة فرنسا قدام برج ايفل، ابي ازور متاحف ايطاليا، ابي اطلع نُزهه في نهر هان في كوريا، ابي اركب مترو مزدحم في الصين ، ابي اشوف طبيعة اليابان واسقي نباتاتها، بخلي العالم يشافي الجروح الي مو راضية تتشافى ، دايم اقول مابي استقر هنا في الامارات، بس ماعرف اذا انا قد البُعد من بلادي، اتمنى وقتها ماكون وحيدة زي الحين، ارجوك خلينا نستمر في الهوايات وما نقطعها خاصة الرسم لا تنسين ان الرسم عالجني في سنة ٢٠٢٠ هو الي طلعني من حزني وخلاني اكمل الطريق، اتمنى يكون تصويري لسى حلو في ذلك الوقت، يارب عضلات بطني تطلع لاني اسوي تمارين، يارب عاد استمر، خلينا نكون صحيين، وناكل اكل زين، بخصوص النصوص والاغاني الي نكتبها في نوت التلفون استمري في الكتابة سواء كتابات حزينة او جميلة خلينا نستمر في كتابتها كل هذي الاشياء تعالجني بطريقة ما، اتمنى في ذاك الوقت اكون حبيت نفسي بشكل كبير، لا تضغطين على نفسك وتقولين ابي اكون كاملة لا تنسين ان الكمال لله وحدة، لذلك خلينا نخفف على انفسنا ونهون عليها مو نزيدها، هالفترة اتعلم انجليزي بليز يارب استمر واكون وقتها اتكلم بطلاقة، نسيت شي هذي السنة صحيح كانت صعبة الا انها غيرت شخصيتي صرت جريئة كثير واتكلم بعفوية حتى مع الغرباء، شخصيتي هي الشي الوحيد الي مستحيل اكرهه فيني، لذلك خلي شخصيتنا حلوه مثل الحين جريئة وقوية وما تسكت عن الحق، لا تنسين اذا صارت معي فلوس نتبرع فيها ونساعد الناس ، هذا حلم الطفولة خلينا نحققه، لا تنسين موضوع دار الايتام الي قلت بزوره واسعد الاطفال بالالعاب ، مو بس بعطيههم العاب لازم نساعدهم معنويا وماديا، ونحبهم بصدق، رسالة مو مرتبة والافكار داخله في بعض ايوا هذا بالضبط الي داخلي حاليا، قاعده اكتب الرسالة ومنسدحة على سريري بس فيني راحة الحمدلله، يارب امي لا تحرمني من وجودها ادمها لنا وخفف عنها همومها، اختي حامل يارب تجيب نونو حلو وسالم، يارب حلا بنت اخوي تكون بخير معانا في ذاك الوقت ، يارب لا تنساها يارب اشفها ، واشف مرضى المسلين ، وارزق جميع المسلمين والناس كلهم. يارب العالم في فوضى ارجوك رتب هذي الفوضى ، شيل الاحزان من قلوب الناس، يارب ساعد كل شخص يحتاج المساعدة، يارب عوضنا وارزقنا السعادة.