A letter from Jun 1st, 2021

Dear FutureMe, إزيك يا عزيزتي؟ أتمنى متكونيش مستغربة أو مستنكرة طريقتي اللينة معاكِ، وأنا اللي دايمًا كنت قاسية عليكِ. أتمنى تكوني اتغيرتي شوية والظروف حواليكِ اتغيرت. كنت عايزة أفكرك إن بقالي يومين مش عارفة أقفل تمبلر علشان بكلم عبدالرحمن وهو بيتأخر بالساعات في الرد. المهم كنا بنتكلم الساعة ١٢ نص الليل وبعد ما طلبت منه يتمنى أمنية كعادتي كل ليلة، قلت له إني هخلي الفيوتشر مي تفكرني أسمع أغنية كيفك إنت بتاعه فيروز كمان ٥ سنين. هو معلقش، وأنا مكونتش هحب إنه يعلق. قلت له: "تخيل بتقوله إنت الأساسي وبحبك بالأساس، وبيطلع ع بالي أرجع أنا وياك، وقال إيه صار عندك ولاد!" هو قالي لا ترجع ع راسي دي، قلبي بيقف فيها. https://soundcloud.com/doritos-gfx/fairouz-kefak-enta?ref=clipboard&p=a&c=0&utm_source=clipboard&utm_medium=text&utm_campaign=social_sharing بعدها بعتت له أغنية يا جبل اللي بعيد، وقلت له "بعدوا الحبايب بيعدوا والقلب دايب، يادي النيلة" هو معلقش بردو بس أنا عيطت. لسه مش مستعدة إن الحبايب يبعدوا. https://soundcloud.app.goo.gl/YTvM2 النهاردة فكرت أعترف له بحبي اللي كان، بس مكونتش عايزة دا يحصل دايركتلي، طلبت منه الياهو علشان أبعت له من هنا، وهو كروتني كما هو المتوقع. معرفش إيه اللي أنا بعمله دا ومعرفش هندم عليه ولا لأ، لكن اللي أعرفه إني إنتهيت ومش هخرج من هنا أبدًا، فمش فارقة كتير لو قلت أو مقولتش. أنا بس عايزة أتخفف من عبء قلبي وذاكرتي، وعايزة أحس إني حرة، وحتى لو دا معناه إني هجازف وهخلي حاجات كتير على المحك. أنا معرفش ممكن يحصل إيه في الـ ٥ سنين الجايين، ومش عارفة كل واحد فينا هيبقى فين من العالم، لكن أتمنى لما أسمعها يكون وقعها خفيف عليا وعلى قلبي، مابقاش لسه بتألم بالشكل دا. أتمنى وقتها أكون في مكان جميل وبعيد وسايبة كل حاجة ورايا. عايزة أبدأ من الأول. عايزة أنسى يا رب، أرجوك.