A letter from February 2nd, 2021

أهلاً بيكِ يا الجميلة لو ربي عطاني عمر ح يكون عمري 26سنة ، يعني ممكن بعد ٨ سنين أو ٩ سنين. إنجازتي الأن. كملت الثانوية الحمد الله ، خشيت الجامعه بتخصص اللي نحِبه "تقنية الطبية" فشلت فيه سيم الأول و توا عندي مادتين ح نكملهن وبإذن الله ح نخش سيم الثاني ونتخصص "مختبرات". من شهرين خشيت المعهد اللغات ، قريباً ح نبدأ فالسيم الثاني، ح نكمل هالتخصص و نفتخر جداً ب شهادتي بعد سنة ونص هكي. نأخد فيه كورسات التنميه و شور علم النفس جميعاً. خديت شهادة "شور الصدمه عند الأطفال" خديت شهادة"كوني لنفسك كل شئ" ح نأخد أكثر وأكثر. قاعدة نطور من نفسي أكثر. قاعدة نتقرب من ربي أكثر و مانقصرش معاه ويارب ثبتني. مخاوفي الأن. نخاف من إنه نفقد حد من عيلتي. نخاف من بكرا نخسر شي نحبه. نخاف من القاعه أمتحان. أهدافي. نحِب الكتابة جداً بس مش عطيتها حقها ، نحِب الطبخ على حسب الجو ، نحِب الكورشية و ح نطور فيها. بإذن الله ح نحاول نكتب مقاله وننشرها عن قريب ، نعطيه كورسات ونكون من أجمل الكوتشات فاليبيا ، نكون احسن أخصائيه مختبرات. نفتح مختبر فالمستقبل. نتمنى نسافر الأمريكا وخاصتاً كندا ، نتمنى نكمل قرايتي و نتخرج ونقرأ ماجستير و نكون فخورة بنفسي أكثر. نفتح مشروع صغيرون كيف الكورشية مثلاً. نصيحتي لنفسي. "لا تستسلمِ مهما تعثرتي أوقفي وكملي طريقك ما تخلش شي يوقفك يا أنا" "ح تكون لكِ بصمه وحاجه حلوة بس أستمري فيه طريق لصح" ماذا تفعل من أجل أن تسترخي؟ أنطفئ الإضاءة ونتأمل. مق قهوة وقراءة الكتب. نتنفس بعمق. من هو الشخص الأكثر أهميه فيه حياتك؟ عيلتي وبالأخص أمي حبيبة قلبي. كيف تبدو علاقتك مع والديك؟ مليانه حُب و توتر و فرحه مليانه شعور ملخبط ربي ما يحرمني منهم. كيف يعاملونك وكيف تعاملهم؟ يعاملوني بالحنيه ونعاملهم أيضاً بالحنية. إذا كان بإمكانك تغيير شي واحد فيه حياتك، فماذا سيكون هذا الشيء؟ إنه نعيش برا ونكمل قرايتي و نحقق كل طموحاتي.