A letter from January 10th, 2021

إلى المستقبل المجهول المرسل : زينة جمال محمود عباسي ما بعرف كيف أبلش ، أفكاري مشوشة وملخبطة نوعًا ما ، راح أحاول أكتب إلي بقلبي ، في كثير أشياء صارت بحياتي كثير أشياء غيرتني بس الصراحة للأسوء ما بعرف إذا اشي منها كان إيجابي ، تغيير مش مثل ما بحلم قبل أربع سنين من صف عاشر لهذا اليوم وهاي اللحظة تغيرت كثير ، تغيير مش طبيعي تغيير دمر حياتي تغيير كان صعب كثير علي وجديد ولا مرة فكرت راح أنحط بهيك التجربة ، من بعد الفترة الطويلة والصعبة إلي مريت فيها بعد الأربع سنين ووضعي إلي صار صعب حاولت أتغير بهذا الوقت أتخلص من همومي وتعبي والخذلان إلي مريت في وكثير شغلات بس لهلأ مش قادرة أتغير مش قادرة أصير إنسانة جديدة ، التغيير الأول إلي صار علي وعلى حياتي كان مش بإرادتي تغيير فوق طاقتي بكثير وهلأ بدي أرجع أتغير بس مش طالع بإيدي معقول أنا من النوع إلي ما بعرف يتغير جد الإشي صار مهلك ومتعب بالنسبة إلي ، راح أدعي وأطلب من ربي التغيير ، بهذا الوقت خايفة كثير ، خايفة من كل إشي خايفة من الأيام والقدر والخذلان والخسارة ، مش عارفة أعيش حياتي مش عارفة أصير إنسانة غير ... إذا ضليت أحكي عن عقدي مش راح أخلص يا أنا وإنتِ أكثر وحدة بتعرفيني ، المهم بتمنى أتغير، بتمنى أصير غير ، بتمنى أحقق كل أحلامي ، بتمنى أصير كاتبة كبيرة ومشهورة وأكتب روايات الله يعطيني القوة لأحقق حلمي هذا ، بتمنى أحكي مع سامية بتمنى الأيام تخف عني شوي بتمنى تحكي معي يا الله شو مشتاقتلها كثيير مشتاقة ، بكتب هلأ وإيدي بترج ما بعرف إذا بعد وقت راح تخف هاي الرّجة الله أعلم ، كوني يا أنا مختلفة حققي أحلامك ضلي قوية إرجعي رممي حالك من جديد ، أكثر حدا مدينة إلو بإعتذار نفسي سامحيني يا أنا سامحيني لإني عذبتك كثير لإني أذيتك لإني ما كنت أنانية بحب حالي وفضلت غيري على نفسي بتمنى بعد هالوقت إلي مرق ولما أقرأها أكون متغيرة أكون أفضل وأحسن بتمنى أكون حققت أحلامي وأهمها الكتابة وأحكي مع سامية ، ديري بالك على حالك يا زينة حبي حالك وما تقسي عليها ، إن شاء الله كل اشي بتغير وبصير أحسن ، بتمنى تبقى معي فاطمة على طول وما تتركني ، هالمخلوقة بتختلف عن الكل وقفت جمبي وساعدتني كانت إلي كتف بتمنى تبقى مبسوطة على طول الله يخليلي اياها وما يحرمني معها ، إن شاء الله لما أقرأ الرسالة تكون لسا معي وما تكون تركتني أو خفت علاقتنا الله يحفظلي اياها ، إن شاء الله بخلص جامعة وبتخرج بستنى التخرج على نار ، درست أدب عربي فرعت صحافة وإعلام بجامعة بيت لحم بتمنى ألاقي شغل وأصير صحفية ناجحة ، بتمنى أسافر وأزور كل العالم ، بتمنى آخذ الرخصة وأجيب سيارة ديسكفري لون أبيض وأسود ، بتمنى أكتب رواية وأعمل حفل توقيع للرواية وأصير مشهورة بتمنى أبعت دعوة لسامية وتيجي تحضرني وتفخر فيّ ، الله يخليلي أهلي ويديم ماما وبابا فوق راسي ، الله يعطيني الصحة والقوة ، بتمنى أكون حدا منجز بحياته وعمل كثير أشياء وأكون معروفة وأحقق كل إشي بتمناه ، حكيت كثير على فكرة إنتِ ثرثارة يا أنا (هاي الفكرة من رواية فلتغفري وأحببتك ) بتمنالك يا زينة أيام حلوة ولما توصلني الرسالة أكون جد حققت أشياء من أحلامي ولو جزء بسيط منشان أفخر بحالي إن شاء الله أضل عايشة والله يكتبلي عمر لأقرأها سلام 🙋‍♀️🤍 اليوم الأحد التاريخ 10 يناير 2020 الساعة 6:18 التوقيع : زينة جمال